’Yan takarar jam’iyyar PDP guda uku da ke neman kujerun Majalisar Dokokin Tarayya a Babban Birnin Tarayya Abuja (FCT) sun janye takararsu, tare da goyon bayan ’yan takarar jam’iyyar APC gabanin zaɓen 2027.
’Yan takarar da suka janye su ne Gomna Stephen Gashe, mai neman kujerar wakiltar Abaji, Gwagwalada, Kwali da Kuje; Ahmed Dogara Jacob, mai neman kujerar Municipal da Bwari; da Angulu Bako, wanda ke neman kujerar Sanata.
Sun sanar da matakin ne ranar Litinin a Abuja, yayin wani taron masu ruwa da tsaki na ƙungiyar Rainbow Coalition, wadda Ministan Abuja, Nyesom Wike, ya kira domin haɗa kan ’yan siyasa daga jam’iyyu daban-daban wajen tallafa wa sake zaɓen Shugaba Bola Tinubu.
- Sojoji sun kashe ’yan ta’adda shida a Adamawa, sun kwato makamai
- Wike ya ce Rainbow Coalition ba barazana ba ce ga APC
- Sojoji sun kama mutum huɗu da ake zargi da safarar makamai a Filato
’Yan takarar APC da za su amfana da matakin sun haɗa da Danladi Chiya, mai neman kujerar Abaji, Gwagwalada, Kwali da Kuje; Shekwogaza Gabaya, mai neman kujerar Municipal da Bwari; da Philip Aduda, wanda ke neman kujerar Sanata.
Da yake jawabi a taron, Wike ya ce ya amince a bar wa APC kujerun Majalisar Dokokin Tarayya na FCT saboda Shugaba Tinubu na zaune a yankin.
Ya bayyana kansa a matsayin jagoran siyasa na sake zaɓen Tinubu a FCT da Jihar Rivers.
Wike ya ce duk da bambancin jam’iyyunsu, ya kamata ’yan siyasar PDP da APC su haɗa kai wajen cimma burin sake zaɓen shugaban ƙasar.
Ya kuma ce a jiharsa ta Rivers, yana fatan samun wasu kujeru, duk da cewa ya amince a bar wa APC kujerun uku na FCT.
Bayan haka, ’yan takarar PDP ɗin sun bayyana goyon bayansu ga Wike tare da alƙawarin yin aiki tare da shi.
Wannan mataki ya zo ne a daidai lokacin da ake samun saɓani tsakanin Wike da wasu gwamnonin APC kan ƙungiyar Rainbow Coalition.
Gwamnonin sun bayyana cewa ba za su goyi bayan wata ƙawance ko tsarin siyasa da zai iya raunana APC ko kawo cikas ga sake zaɓen Tinubu a 2027 ba.
Sun kuma yi gargaɗin cewa ba za su amince da duk wani tsari da zai haifar da ruɗani, ko rabuwar kai ko saɓanin biyayya a cikin APC ba.