Kwamishinan ’yan sandan babban birnin tarayya Abuja (FCT), CP Ahmed Muhammed Sanusi, ya karɓi baƙuncin Kwamandan rundunar tsaron hedikwatar tsaro ta sojin Najeriya, Manjo Janar RT Utsaha, a ziyarar ban girma da ya kai hedikwatar rundunar ’yan sanda da ke Abuja.
Sanarwar da jami’in hulɗa da jama’a na rundunar ’yan sandan FCT, SP Josephine Adeh, ta fitar ta ce ziyarar ta gudana ne a ranar Talata, 13 ga Oktoba, 2026.
- Wike ya tabbatar wa Qatar da goyon bayan FCT kan filin ofishin jakadancinta
- Rundunar Sojin Sama ta Najeriya ta kafa kwamitin binciken hatsarin jirginta a Ondo
- APC ta ce ba za ta yi koyi da yadda Atiku ke kiran Tinubu da sunansa ba
A yayin ganawar, jami’an sun tattauna hanyoyin ƙarfafa haɗin gwiwar da ke tsakanin rundunar ’yan sandan FCT da rundunar tsaron hedikwatar tsaro ta sojin Najeriya, musamman wajen musayar bayanan sirri, gudanar da ayyukan haɗin gwiwa da kuma ci gaba da haɗa kai domin inganta tsaro a babban birnin tarayyar.
Kwamishinan ’yan sandan ya gode wa Manjo Janar Utsaha da tawagarsa bisa ziyarar, tare da jaddada aniyar rundunarsa na ƙarfafa haɗin gwiwa da sauran hukumomin tsaro, musamman sojoji, domin tabbatar da tsaron rayuka da dukiyoyin mazauna FCT.
Sanarwar ta ƙara da cewa ziyarar ta ƙare ne da musayar fatan alheri tsakanin jami’an biyu da kuma ɗaukar hoton haɗin gwiwa.