Mukaddashin Kwanturolan Kwastam yankin Lekki Free Trade Zone, Mataimakin Kwanturol Olufemi Kukoyi, ne ya bayyana hakan ga manema labarai ranar Alhamis, 15 ga Oktoba, 2026, inda ya ce tashar ba za ta zama hanyar shigar da haramtattun kayayyaki cikin ƙasa ba.
Kukoyi ya ce jami’an hukumar sun kama wani kwantena mai lamba PRSU1562064 a ranar 19 ga Agusta, 2026, wanda aka shirya kaiwa wani wurin ajiyar kaya da ke ƙarƙashin kulawar kwastam a wajen yankin.
- Dan’iya ya bukaci Tinubu ya sake duba nadin ɗan’uwan gwamnan Sokoto a INEC
- Kwanturol Janar na Kwastam ya bukaci sababbin jami’ai su fifita muradun ƙasa
Bayan jami’an tsaro sun bincika kwantenan, sun gano fakiti 400 na tabar wiwi da aka ɓoye cikin takardun bugawa masu girman A4 guda 798.
Ya bayyana cewa darajar tabar wiwin da aka kama, bisa ƙididdigar kuɗin haraji da sauran kuɗaɗen da suka shafe ta, ta kai naira biliyan 2,262,960,000.
Kukoyi ya ce kama kayan ya taimaka wajen kare ’yan Najeriya daga illolin fataucin miyagun ƙwayoyi da kuma amfani da su.
Bisa ƙa’idojin aiki, hukumar Kwastam ta miƙa kayan ga Hukumar Yaƙi da Sha da Fataucin Miyagun Ƙwayoyi ta Najeriya (NDLEA).
Da yake karɓar kayan, Kwamandan NDLEA na sashen tashar jiragen ruwa ta Lekki, Kwamanda Jonah Achema, ya ce kamen ya nuna cewa hukumomin tsaro sun ƙuduri aniyar ƙarfafa haɗin gwiwa wajen yaƙi da fataucin miyagun ƙwayoyi.
Achema ya ce tabar wiwin mai nauyin kilogiram 400, wadda ya bayyana cewa ta fito daga Thailand, babban kamu ne, musamman ganin wasu manyan kamun da aka yi a tashar a baya.
Ya ambaci kwantenoni biyu na magungunan opioids da aka haramta, Tramadol 225 da Tramaking Royal 250, masu nauyin tan 46 da aka kiyasta darajarsu a kasuwa ta kai naira biliyan 35.