Hukumar Tsaro ta Farin Kaya (DSS) ta gurfanar da mutum biyar da ake zargi da hannu a sace ɗalibai 20 da ke shirin shiga hidimar ƙasa ta NYSC da wani farar hula a Jihar Imo.
An gurfanar da waɗanda ake zargin a gaban Babbar Kotun Jiha ta Justice Oputa da ke Owerri, babban birnin jihar, bayan kama su a wasu samamen sirri da aka gudanar a jihohin Rivers da Abia.
An sace ɗaliban ne a ranar 1 ga Oktoba, 2026, kusa da Umunoha a Ƙaramar Hukumar Mbaitoli, yayin da suke tafiya daga Ibadan ta Jihar Oyo zuwa sansanonin horas da masu hidimar ƙasa da aka tura su a jihohin Abia da Akwa Ibom.
- Amnesty International ta bukaci a dauki mataki kan zargin kashe fararen hula da ’yan sanda ke yi
- ’Yan sanda sun ceto mutane 18, shanu 20 a jihohi daban-daban
- Gambiya ta tare bakin haure 46 da ake zargin na shirin yin hijira ba bisa ƙa’ida ba
A ranar 7 ga Oktoba, jami’an tsaro sun ceto ɗaliban 20 da farar hular a daji da ke Amakohia-Ubi, a Ƙaramar Hukumar Owerri West, inda daga bisani aka kai su asibitin DSS da ke Owerri domin duba lafiyarsu.
DSS ta ce ta kama mutum biyar ɗin ne tsakanin 10 zuwa 14 ga Oktoba a Fatakwal ta Jihar Rivers da Aba ta Jihar Abia, yayin da wasu mutum uku da ake zargi suka tsere da raunukan harbin bindiga.
Ana ci gaba da farautarsu da sauran waɗanda ake zargin suna da hannu a ƙungiyar masu garkuwa da mutane.