Shugaban Majalisar Dattawa, Sanata Godswill Akpabio, ya jagoranci tawagar Najeriya zuwa taron 153 na Kungiyar Majalisun Duniya (IPU), da ake gudanarwa a Arusha, Tanzania.
A yayin bude taron, Shugabar Tanzania, Samia Suluhu Hassan, ta jaddada muhimmancin ƙarfafa majalisu, tabbatar da rikon amana da zurfafa haɗin gwiwar ƙasashe domin magance ƙalubalen da duniya ke fuskanta.
- Kaduna ta shafe sama da shekaru uku ba tare da rikicin ƙabilanci ko addini ba – Uba Sani
- Hope Uzodimma ya nemi ’yan Najeriya su ci gaba da mara wa Tinubu baya
Taron na wannan shekarar na karkashin taken “Inganta shugabanci nagari da ƙarfafa al’umma ta hanyar haɗin kai, amana da samar da dama ga kowa.”
Akpabio ya ce halartar Najeriya na ba ƙasar damar ƙara ƙarfafa dangantakar diflomasiyyar majalisa, da kuma bayar da gudunmawa wajen tattaunawar da za ta inganta shugabanci nagari, zaman lafiya da ci gaba mai ɗorewa.
Ya ce a yayin da ƙasashe ke fuskantar yaƙe-yaƙe, matsalolin tattalin arziki da sauyin yanayi, haɗin gwiwa tsakanin majalisun duniya ya zama mafi muhimmanci wajen nemo hanyoyin magance waɗannan matsaloli.