Hukumar Kula da Harkokin Yaɗa Labarai ta Guinea (HAC) ta dakatar da shirye-shiryen gidan talabijin na RTB mallakin gwamnatin Burkina Faso a faɗin ƙasar.

Matakin ya biyo bayan yaɗa wani sharhi da kuma hoton zanen barkwanci da hukumomin Guinea suka ɗauka a matsayin cin mutuncin Shugaban Ƙasar, Mamadi Doumbouya.

Hukumar ta ɗauki matakin ne bayan abubuwan da gidan talabijin ɗin ya yaɗa, waɗanda suka jawo ce-ce-ku-ce tsakanin ƙasashen biyu.

Dakatarwar na zuwa ne kwanaki kaɗan bayan da hukumomin Guinea suka kori sama da mutum 150,000 da ke haƙar zinare a ƙasar, waɗanda mafi yawansu ’yan asalin Burkina Faso ne.

Guinea ta ce korar masu haƙar zinaren na da nasaba da kare muhalli da kuma dakile barazanar tsaro da take ganin suna iya tasowa daga ayyukansu.

Matakan biyu sun zo ne a daidai lokacin da ake samun takun-saka tsakanin ƙasashen biyu, musamman kan yadda ake gudanar da ayyukan haƙar ma’adinai da kuma abubuwan da ake yaɗawa a kafafen yaɗa labarai.

By Bashar Muhammad Dange

Bashar Muhammad is a Nigerian multimedia journalist, broadcaster, producer, and Digital Manager at Blueprint Radio Hausa. He holds a B.Sc. and a Diploma in Mass Communication. He has experience in news reporting, radio production, digital media management, and content creation.

Leave a Reply

Your email address will not be published. Required fields are marked *