Babbar Kotun Jihar Kano mai lamba 11 da ke Bompai ta yanke wa Umar Auwal da Yakubu Dayyabu hukuncin kisa ta hanyar rataya, bayan samunsu da laifin kashe Fatima Abubakar da ’ya’yanta shida a unguwar Dorayi Ciranci.
Mai Shari’a Nasiru Saminu ne ya yanke hukuncin a ranar Juma’a, 6 ga Nuwamba, 2026, bayan nazarin shaidu da hujjojin da aka gabatar a gaban kotun.
- Majalisar Wakilai ta yi watsi da ƙorafin neman soke lasisin rarraba iskar gas na NIPCO
- INEC ta horas da masu horas da jami’an zaɓe kan gudanar da zaɓen 2027
Kotun ta samu Umar Auwal, wanda aka fi sani da Breaker, da Yakubu Dayyabu, wanda ake kira Wawo, da laifin kisan da ya faru ranar 17 ga Janairu, 2026.
Sai dai kotun ba ta samu Isiyaku Yakubu da laifi ba a wannan shari’ar. Duk da haka, ta ce a ci gaba da tsare shi har zuwa ranar 11 ga watan Nuwamba, domin yanke hukuncin ƙarshe kan zargin kisan wata matar aure da kishiyarta a unguwar Tudun Yola, kamar yadda jaridar Arewa Update ta ruwaito
Tawagar masu gabatar da ƙara ta ƙunshi Babban Lauyan Gwamnatin Kano kuma Kwamishinan Shari’a, Abdulkarim Kabir Maude, tare da Barrister Salisu Muhammad Tahir. Barrister J. I. Musa da Barrister A. I. Baba ne suka wakilci waɗanda ake ƙara.