Shugabannin kwamitocin kula da rundunar sojin saman Najeriya na Majalisar Dattawa da ta Wakilai sun kai ziyarar ta’aziyya ga Babban Hafsan Sojin Sama, Air Marshal Sunday Kelvin Aneke, bayan hatsarin jirgin sama da ya shafi jami’an rundunar.
Sanarwar ta ce Sanata Osita Ngwu da ɗan majalisa Kabiru Rurum, waɗanda ke jagorantar kwamitocin a majalisun biyu, sun kai ziyarar tare a hedikwatar rundunar sojin sama da ke Abuja ranar 13 ga Oktoba, 2026.
- El-Rufai ya gurfana a kotu domin ci gaba da shari’ar rashawa
- Rundunar ’yan sandan FCT ta gana da babban jami’in rundunar sojin Najeriya
A yayin ziyarar, ’yan majalisar sun miƙa saƙon ta’aziyyarsu ga babban hafsan sojin sama, jami’an da abin ya shafa da kuma sauran al’ummar rundunar, tare da jajantawa iyalan waɗanda suka gamu da wannan ibtila’i.
Sun yaba da sadaukarwar jami’an sojin sama wajen yi wa ƙasa hidima, tare da tabbatar wa rundunar cewa Majalisar Tarayya za ta ci gaba da ba ta goyon baya a wannan lokaci mai wuya.
Haka kuma, sun yi addu’ar Allah Ya ba waɗanda abin ya shafa da iyalansu haƙuri, ƙarfi da kwanciyar hankali, tare da roƙon Allah Ya kiyaye sauran jami’an rundunar daga irin wannan ibtila’i.