Gwamnatin Jihar Ogun da kamfanin DP World sun rattaba hannu kan yarjejeniyar fahimtar juna domin haɓaka tashar ruwa mai zurfi ta Gateway da kuma shiyyar tattalin arziki ta Blue Marine a jihar.
An rattaba hannu kan yarjejeniyar ne a Paris, da ke Faransa, inda Shugaban Ƙasa Bola Ahmed Tinubu ya tabbatar wa masu zuba jari cewa gwamnatin tarayya za ta samar da ingantaccen tsarin dokoki da daidaiton manufofi da yanayin kasuwanci mai sauƙin hasashe domin ƙarfafa jarin cikin gida da na ƙasashen waje.
A cewar sanarwar Fadar Shugaban Ƙasa, yarjejeniyar ta ƙunshi zuba jari na farko da ya haura dala biliyan 7, yayin da ake hasashen ayyukan za su samar da guraben aiki sama da 50,000 kai tsaye, tare da ƙarin ayyukan yi a sassa daban-daban na tattalin arziki.
- Atiku ya naɗa Akobundu shugaban kwamitin yaƙin neman zaɓen ADC, El-Rufai ya zama mataimakinsa
- Tinubu ya nemi a bai wa Afirka kujerun dindindin a Kwamitin Tsaron Majalisar Dinkin Duniya
Shugaba Tinubu ya ce tashar ruwan da za a gina a yankin Ogun Waterside za ta kasance da tsawon wurin ɗora kaya na kilomita huɗu da zurfin mita 18, abin da zai ba ta damar karɓar manyan jiragen ruwa.
Ya ce hakan zai taimaka wajen rage cunkoso a tashoshin Apapa da Tin Can Island, tare da rage kuɗaɗe da jinkirin da masu shigo da kaya da masu fitar da kayayyaki ke fuskanta.
Gwamnatin ta kuma ce shiyyar tattalin arzikin ta Blue Marine za ta mamaye fili mai girman hekta 10,000, inda ake sa ran za a sarrafa albarkatun cikin gida da samar da kayayyakin da za a fitar da su zuwa ƙasashen waje, tare da ƙirƙirar damammakin aiki ga matasa.
Tinubu ya ce tashar ruwan za ta kasance muhimmin ginshiƙi ga shiyyar masana’antar, tare da haɗa yankin da Lagos, sauran sassan Najeriya da kasuwannin nahiyar Afirka.
Shugaban Ƙasa ya kuma yi alkawarin cewa gwamnatin tarayya za ta taimaka wajen samar da hanyoyin mota da layin dogo da wutar lantarki, tare da ƙarfafa tsaron zuba jari da rage matsalolin hukumomi da ka iya kawo cikas ga aiwatar da ayyukan.
A cewarsa, ayyukan za su taimaka wajen bunƙasa tattalin arzikin teku da kuma rage dogaro da man fetur, yayin da Najeriya ke ƙoƙarin zama babbar cibiyar kasuwanci da sufuri da fitar da kayayyaki a yammacin Afirka.