Hukumar yi wa ƙasa hidima ta NYSC ta ce za ta ƙara ƙarfafa matakan tsaro da kare lafiyar ma’aikata, ’yan bautar ƙasa, baƙi da kadarorin gwamnati a dukkan ofisoshinta.
Darakta-Janar na NYSC, Birgediya Janar Olakunle Nafiu, ne ya bayyana hakan yayin buɗe taron horas da jami’an kula da lafiya, tsaro da muhalli na hukumar karo na farko a Abuja.
Nafiu, wanda Daraktan kula da albarkatun ɗan’adam, Nura Umar, ya wakilta, ya ce hukumar za ta riƙa gano haɗurran wurin aiki, tantance haɗari da ɗaukar matakan hana raunuka da cututtuka.
- WHO ta ce babu sauran mai cutar Ebola a Najeriya
- Uzodimma ya bukaci ’yan jarida su fifita gaskiya da riƙon amana
Ya buƙaci ofisoshin NYSC su riƙa duba wuraren aiki, kula da kayan kariya, gudanar da atisayen kashe gobara da kuma tanadin kayan agajin gaggawa.
Ya ce ya kamata a riƙa yin rigakafin haɗari maimakon jira sai an samu matsala.
Daraktar sashen kula da ayyukan gama-gari, Yetunde Baderinwa, ta ce taron zai taimaka wajen samar da tsari mai ɗorewa na kare lafiya da muhalli a ofisoshin NYSC.
Mahalarta taron sun haɗa da jami’an kula da lafiya, tsaro da muhalli daga sakatariyoyin jihohi 36 da Abuja.