Rundunar ’Yan Sandan Abuja ta gargadi masu ababen hawa da su guji amfani da motocin da ba su da ingantacciyar lambar mota, motocin da aka yi wa gilashi duhu ba tare da izini ba, da kuma motocin da aka ɓoye ko lalata lambobinsu.
Kwamishinan ’Yan Sandan FCT, CP Ahmed Muhammed Sanusi, ya bayar da umarnin kama tare da gurfanar da duk wanda aka samu yana karya dokokin, yana mai cewa irin waɗannan motoci na iya sauƙaƙa wa masu aikata laifuka ɓoye kansu daga jami’an tsaro.
- APC ta caccaki Amaechi kan zargin kasa biyan maganin mahaifiyarsa
- APC ta caccaki Amaechi kan zargin kasa biyan maganin mahaifiyarsa
Rundunar ta kuma yi gargaɗi kan amfani da lambobin diflomasiyya na bogi ko kuma amfani da irin waɗannan lambobi ba tare da izini ba.
Kwamishinan ya umarci jami’an ’yan sanda a faɗin Abuja da su tsaurara bincike da tabbatar da bin dokokin da suka shafi lambobin motoci da amfani da gilashin duhu, tare da gargadin jami’ai kada su yi amfani da aikin wajen karɓar kuɗin haram.
Rundunar ta kuma buƙaci mazauna Abuja su taimaka wajen tabbatar da tsaro ta hanyar kai rahoton motocin da ake zargi ko wasu abubuwan da ba su dace ba ga ofishin ’yan sanda mafi kusa.