Kamfanin siminti na Dangote Cement, masana’antar Obajana, ya tallafa wa al’ummar Jakura da tallafin karatu ga ɗalibai, kayan aikin noma da kuɗaɗen jari ga manoma da mata masu sana’o’in kasuwanci, a wani shiri na bunƙasa tattalin arzikin al’umma da rage talauci.
Daraktan masana’antar, Injiniya Azad Nawabuddin, wanda shugaban sashen hulɗa da al’umma, Prince Ademola Adeyemi, ya wakilta, ya ce shirin wani ɓangare ne na cika alƙawuran da ke cikin yarjejeniyar bunƙasa al’umma (CDA).
Kamfanin ya bayar da tallafin karatu ga ɗalibai 20 da ke manyan makarantun gaba da sakandare, tare da wasu ɗalibai 60 na makarantun sakandare.
- Hukumar Shige da Fice ta Gambia ta ceto mutane 111 da ke ƙoƙarin yin ƙaura ta ruwa
- Wike ya umurci ’yan takarar PDP a FCT su janyewa APC gabanin zaɓen 2027
Haka kuma, manoma 20 sun samu kayan aikin noma da kuɗaɗen tallafi domin inganta ayyukansu da ƙara yawan amfanin gona.
Bugu da ƙari, mata masu sana’o’in kasuwanci guda 20 sun samu kuɗaɗen jari da tallafin kasuwanci domin bunƙasa sana’o’insu, ƙarfafa dogaro da kai da inganta kuɗaɗen shigar iyalansu.
Da yake jawabi a wajen taron, shugaban kwamitin yarjejeniyar bunƙasa al’ummar Jakura, Chief Bonibade Ajiboye, ya yaba wa kamfanin bisa cika alƙawuransa.
Ya kuma bayyana cewa aikin samar da wutar lantarki a yankin ya kusa kammaluwa, duk da ƙalubalen tsaro da ake fuskanta.
A nasa jawabin, Sarkin Jakura, Oba Usman Adoga Ajibola, ya gode wa shugaban rukunin kamfanonin Dangote, Alhaji Aliko Dangote, bisa zuba jari a yankin da kuma ayyukan raya ƙasa da kamfanin ke aiwatarwa.
Ya yi alƙawarin cewa al’umma za ta kula da ayyukan domin su ci gaba da amfanar jama’a, tare da kira ga waɗanda suka ci gajiyar tallafin da su yi amfani da shi yadda ya kamata.