Kotun Tarayya da ke Gombe ta umarci jam’iyyar PDP da ta gudanar da sabon zaɓen fidda gwani domin samar da ɗan takararta na gwamnan jihar a zaɓen 2027, bayan ta soke tsarin da ya samar da Farfesa Isa Ali Pantami a matsayin ɗan takarar jam’iyyar.
Hukuncin, wanda Mai Shari’a Amina Aliyu Mohammed ta yanke, ya biyo bayan ƙarar da Usman Aliyu Garry ya shigar yana ƙalubalantar yadda Pantami ya samu tikitin PDP.
Garry ya yi zargin cewa ba a gudanar da zaɓen fidda gwani da ya dace da ƙa’idojin jam’iyya da dokokin zaɓe ba.
- Shugaban Majalisa Abbas ya bukaci tattaunawa tsakanin majalisun Najeriya da Saudiyya yakasan ce duk shekara
- Kano ta amince da mayar da PHC biyar zuwa manyan asibitoci
Pantami, wanda ya kasance mai neman tikitin APC a baya, ya koma PDP ne bayan APC ta amince da Jamilu Gwamna a matsayin ɗan takararta.
Daga bisani Pantami ya samu tikitin PDP ta hanyar amincewar murya a zaɓen fidda gwani na watan Mayu.
Sabon hukuncin ya mayar da batun neman tikitin PDP a Gombe zuwa wani sabon mataki, inda jam’iyyar za ta sake gudanar da tsarin fidda gwani bisa ƙa’idojin da kotu ta ambata.
Wasu rahotanni sun ce sabon tsarin na iya sake haɗa Pantami da sauran masu neman tikitin da suka ƙalubalanci tsarin farko.
Yanzu abin da ake jira shi ne yadda PDP za ta aiwatar da umarnin kotun da kuma waɗanda za su fafata a sabon zaɓen fidda gwanin, yayin da shirin jam’iyyar na takarar gwamnan Gombe a 2027 ya koma wani sabon salo.