Tsohon Ministan Sufurin Jiragen Sama na Najeriya, Femi Fani-Kayode, ya yi tsokaci kan tsohon mataimakin shugaban ƙasa, Atiku Abubakar, dangane da muhawarar da aka yi a majalisar zartarwa ta tarayya kan biyan fansho ga tsoffin ma’aikatan kamfanin jiragen sama na ƙasa, Nigeria Airways.
Fani-Kayode ya bayyana cewa lokacin da tsohon shugaban ƙasa Olusegun Obasanjo ya bar mulkin soja a shekarar 1979, Nigeria Airways na da jirage 32 masu aiki, da ƙwararrun matuƙan jirgin sama da ma’aikata, da kuma ingantaccen tsarin gudanarwa, sai dai ya ce zuwa lokacin da Obasanjo ya dawo kan mulki a 1999, jirgi guda ɗaya ne kawai ya rage, kuma shi ma ba ya aiki.
Ya danganta durƙushewar kamfanin da rashin kyakkyawan shugabanci, da tarin basussuka da cin hanci da rashawa da ya ce sun addabi kamfanin tsakanin shekarar 1979 da 1999.
- Shettima ya soki shirin Atiku na dawo da tallafin man fetur
- INEC ta bai ’yan takara da aka cire daga jerin sunaye wa’adin zuwa 24 ga Oktoba
- Mai bincike ya zargi El-Rufai da ware dala 600,000 domin biyan jami’an EFCC
A cewarsa, wannan tabarbarewa ce ta kai ga rushe kamfanin a shekarar 2004, bayan yunƙurin ceto shi da dama sun gaza.
Da yake magana kan fanshon tsoffin ma’aikatan kamfanin, Fani-Kayode ya ce a matsayinsa na ministan sufurin jiragen sama a shekarar 2006, ya gabatar da takardar neman amincewar majalisar zartarwa ta tarayya domin a biya su kuɗaɗensu. Ya ce an ƙi amincewa da buƙatar, saboda wasu mambobin majalisar sun yi adawa da ita, bisa hujjar cewa tsoffin shugabannin kamfanin da ma’aikatansa sun taka rawa wajen durƙushewar kamfanin.
Ya ce gwamnatin marigayi Umaru Musa Yar’Adua ta sake duba batun tare da biyan mafi yawan ’yan fanshon, yayin da gwamnatin Muhammadu Buhari ta ci gaba da biyan su.
Fani-Kayode ya kuma yaba wa gwamnatin yanzu bisa kammala biyan ragowar kuɗaɗen fanshon, yana mai cewa tsoffin ma’aikatan sun sha wahala na tsawon shekaru.
Dangane da Atiku, Fani-Kayode ya ce ya san matsayin da tsohon mataimakin shugaban ƙasar ya ɗauka a lokacin muhawarar kan fanshon, amma ba zai bayyana shi a bainar jama’a ba.
Ya jaddada cewa shawarar da aka yanke a ƙarshe ta kasance ta gwamnatin gaba ɗaya, don haka dukkaninsu sun ɗauki alhakin sakamakonta.
Wannan furuci nasa ya zo ne a matsayin tsokaci kan rawar da Atiku ya taka a muhawarar, duk da cewa bai bayyana ainihin matsayinsa ba.