Ɗan takarar shugaban ƙasa na jam’iyyar NDC, Peter Obi, ya ce bai ce ’yan Najeriya mazauna ƙasashen waje su daina tallafa wa iyalansu, sai dai yana son a gina ƙasar da jama’a ba za su dogara da ’yan uwansu wajen biyan buƙatun yau da kullum ba.
Obi ya bayyana hakan ne a martaninsa kan abin da ya kira karkatar da saƙonsa da abokan hamayyarsa na siyasa suka yi, duk da cewa ofishinsa na yaɗa labarai ya riga ya fitar da sanarwar ƙarin bayani.
- Tambuwal ya musanta shirin komawa APC
- Sojoji sun ceto wanda aka sace, sun kwato shanu 18 a Kebbi
- Peter Obi ya ce Najeriya na buƙatar shugabanci da zai fifita inganta tattalin arziki
Ya yaba wa ’yan Najeriya mazauna ƙasashen waje bisa sadaukarwar da suke yi wajen taimaka wa iyalansu, ciki har da biyan kuɗin makaranta, magani, haya da abinci, yana mai cewa gudummawarsu ta cancanci girmamawa.
Ya ce manufarsa ita ce a gina Najeriya mai samar da ayyukan yi, ingantaccen ilimi, sauƙaƙa samun kiwon lafiya da damammakin tattalin arziki ga ’yan ƙasa.
Obi ya jaddada cewa ba ya son ’yan Najeriya a ƙasashen waje su yi watsi da iyalansu, sai dai yana fafutukar ganin Najeriya ba ta yi watsi da al’ummarta ba, inda ya yi addu’ar Allah ya albarkaci ’yan Najeriya a gida da ƙasashen waje da kuma ƙasar baki ɗaya.