Sakataren yaɗa labarai na kungiyar tuntuɓa ta Arewa (Arewa Consultative Forum – ACF), Farfesa Tukur Muhammed Baba, ya yi kira ga gwamnatin tarayya da ta bayyana cikakkiyar gaskiya game da halin da tattalin arzikin ƙasa ke ciki, maimakon rage muhimmancin matsalolin da ‘yan ƙasa ke fuskanta a yau da kullum.
Da yake magana Yayin wata hira da gidan talabijin na Arise News, Farfesa Baba ya jaddada cewa ‘yan Najeriya sun cancanci samun sahihin bayani kan turban da tattalin arzikin ƙasar ke kai domin su samu damar auna kyakkyawan aikin gwamnatin.
“Muna son mu ga wani nau’i na gaskiya,” in ji Baba, yayin da ya buga misali da tsohon Shugaban Ƙasa Muhammadu Buhari lokacin da yake neman sake zaɓe inda ya amince da kura-kuransa.
- FCT POWA ta samar da rijiyoyin burtsatse biyar a barikin ’yan sanda
- Hukumar Kwastam ta wayar da kan jami’ai kan cutar sankarar mama
“Ku ba mu sahihin labari mai inganci domin mu yi amfani da shi wajen auna ko za mu iya sake maku ragamar rayuwarmu a hannunku.” in ji shi
Mai magana da yawun na ACF ya jaddada cewa watanni uku sun wadatar ga gwamnati wajen aiwatar da takamaiman matakai na sauƙaƙa tattalin arziki ga al’umma, musamman kudaden makaranta da farashin abinci da ke ƙara hauhawa.
Farfesa Baba ya nuna damuwa mai tsani game da fannin noma, inda ya bayyana cewa ikirarin gwamnati na cewa tattalin arziki yana haɓaka ya ci karo da gaskiyar yadda ake ci gaba da dogaro da shigo da kayan abinci daga waje.
Ya bayyana cewa matsalolin fannin noman ba kawai na rashin tsaro da ‘yan bindiga ba ne, har da tsada mai tsanani na kayan aikin gona.
Yayin da yake fito da tsadar da manoma ke fuskanta, Baba ya ba da misalin yadda manomi ke kashe ₦50,000 wajen gyaran fili da shuka, amma idan ya kai buhu kasuwa sai a saya akan ₦40,000. Ya tsara irin wannan tsarin tattalin arzikin a matsayin “tattalin arzikin tsafi”
A ƙarshe, Farfesa Baba ya buƙaci gwamnati da ta fito fili ta amince inda binciken tasirin manufofinta ya sami kuskure, sannan ta gindaya kudurori masu sauƙi maimakon alkawuran da ba za su yiwu ba.