Hukumar Zaɓe Mai Zaman Kanta ta Ƙasa, INEC, ta tabbatar wa ’yan Najeriya da ƙasashen duniya cewa za ta kasance tsaka-tsaki tare da kare amincin ƙuri’a yayin da aka shiga kwanaki 100 na ƙarshe kafin babban zaɓen 2027.
Shugaban hukumar, Farfesa Joash Amupitan, SAN, ya bayyana hakan a ranar Talata a Abuja yayin taron manema labarai da na masu ruwa da tsaki kan zaɓen 2027.
Ya ce INEC ta kammala matakin tsare-tsare, inda yanzu ta koma aiwatar da shirye-shiryen zaɓen.
Amupitan ya ce an kammala matakai tara daga cikin 14 da ke cikin jadawalin shirye-shiryen zaɓen.
- Cristiano Ronaldo ya bayyana dalilin ficewarsa daga sansanin Portugal
- Hukumar tace Fina-Finai ta amince da rashin lafiyar Tijjani Gandu
Ya kuma bayyana cewa an samu sabbin masu zaɓe 10,772,421 a matakai uku na rajistar masu zaɓe, lamarin da ya kai adadin masu rajista a ƙasa zuwa sama da miliyan 103.
Hukumar ta ce za a baje rajistar masu zaɓe ga jama’a daga 9 zuwa 15 ga Oktoba domin a duba tare da gabatar da ƙorafe-ƙorafe, yayin da rabon katin zaɓe na dindindin, PVC, zai fara daga 9 ga Oktoba.
A bangaren fasaha kuwa, INEC ta ce ta sayi sabbin na’urorin BVAS 57,000, waɗanda ake yi wa ingantaccen gwaji da gyare-gyare kan manhaja, batir da tsarin tantance bayanan ɗan adam domin ƙarfafa tsarin tantance masu zaɓe da rage yiwuwar magudi.
Amupitan ya kuma ce hukumar na aiki tare da hukumomin tsaro da sauran masu ruwa da tsaki domin inganta jigilar kayan zaɓe, horar da ma’aikata da tabbatar da cewa tsarin zaɓen ya kasance cikin gaskiya, zaman lafiya da gaskiya.
INEC ta kuma nemi a saki sauran kuɗaɗen da aka ware mata cikin lokaci domin ta kammala sauran shirye-shiryen da suka rage kafin ranar zaɓe.