Kasashe takwas masu rinjayen Musulmi sun bukaci Isra’ila ta cika alkawuran da ta dauka karkashin matakin farko na shirin tsagaita bude wuta a Gaza, musamman ta hanyar ba da damar shigar da agajin jin kai cikin gaggawa da ba tare da tsaiko ba.
Ministocin harkokin wajen Turkiyya da Masar da Indonesia da Jordan da Pakistan da Qatar da Saudi Arabia da Hadaddiyar Daular Larabawa sun bayyana matukar damuwa kan ci gaba da wahalhalun jin kai da Falasdinawa ke fuskanta a Gaza, tare da yin kira da a dakatar da duk wani take yarjejeniyar.
- Amurka ta ce a shirye take ta gana da Iran a Majalisar Ɗinkin Duniya
- NCAA ta umarci kamfanin Air Peace ya biya fasinjojin jirgin Lagos-Enugu diyya
Irin wannan hadin gwiwa tsakanin kasashen takwas sun dade suna bayyana matsayinsu kan batun Gaza.
Kasashen sun kuma yi watsi da duk wani mataki da zai kai ga korar Falasdinawa ko tilasta musu barin gidajensu, tare da cewa bai kamata a sauya yanayin yankin Falasdinawa ta fuskar kasa ko al’umma ba.
Sun kuma bukaci Amurka ta ci gaba da taka rawa wajen tabbatar da aiwatar da shirin, tare da jaddada cewa Gaza ta kasance wani bangare na yankin Falasdinawa, yayin da ake neman hanyar da za ta kai ga kafa kasar Falasdinawa mai cin gashin kanta.