Magajin birnin New York, Zohran Mamdani, ya yaba da irin tasirin al’adun Najeriya a duniya, yana mai cewa birnin New York ma yana amfana da gudunmawar ’yan Najeriya da ke zaune a cikinsa.
Mamdani ya bayyana haka ne a wajen bikin cikar Najeriya shekaru 66 da samun ’yancin kai da aka gudanar a New York, inda ya ambaci tasirin wakokin Najeriya, da abinci da kuma ƙwallon ƙafa.
- Ambaliyar ruwa ta shafi gidaje 143 a Damaturu
- ’Yan sandan FCT sun gargadi masu ababen hawa kan motocin da ba su da lamba
Ya ce tun yana yaro yana sauraron wakokin ’yan Najeriya, inda ya ambaci Runtown da Patoranking a matsayin wasu daga cikin mawakan da ya sani.
Magajin New York ya kuma ce ’yan Najeriya da ke zaune a birnin sun taka muhimmiyar rawa wajen gina al’umma, yana mai cewa gudunmawarsu ta taimaka wajen sanya New York ta zama abin alfahari.
A nasa jawabin, Jakadan Najeriya a Majalisar Ɗinkin Duniya, Jimoh Ibrahim, ya ce bikin ya zama wata dama ta sake jaddada muhimmancin haɗin kai, zaman lafiya da gina ƙasa.
Ya kuma bayyana ’yan Najeriya mazauna ƙasashen waje a matsayin wani muhimmin ginshiƙi na ƙarfin Najeriya a duniya.