Majalisar ƙungiyar kwadago ta Najeriya, NLC, reshen Abuja, ta umarci ma’aikatan babban birnin tarayya da su fara yajin aikin sai baba ta gani daga ranar Laraba, sakamakon rashin warware wasu rikice-rikicen aiki da suka shafi malaman makarantun FCT.
Matakin ya biyo bayan ƙarewar wa’adin kwanaki bakwai da ƙungiyar ta bai wa gwamnatin FCT, ƙarƙashin jagorancin Ministan Abuja, Nyesom Wike, domin magance matsalolin da suka shafi ƙarin girma da ci gaban malaman makarantu.
Shugaban NLC na FCT, Knabayi Adalo, ya ce ɗaya daga cikin manyan buƙatun ƙungiyar shi ne cire sharadin samun gurbin aiki kafin malami ya samu ƙarin girma, wanda ya ce yana haifar da tsaikon aiki da rage ƙwarin gwiwar malamai.
- Radda zai ƙaddamar da ayyuka da shirin tallafa wa al’umma a Matazu
- 2027: Donald Duke ya ce zai rage farashin fetur zuwa N300 kan lita
Ƙungiyar ta kuma nemi a janye wasiƙun mayar da wasu manyan daraktoci aiki ko rage musu matsayi, musamman waɗanda suka ci moriyar dokar shekarar 2022 da ta tanadi shekarun ritayar malamai, tare da ba malaman da suka cancanci jarabawar ƙarin girma ta 2025 damar rubuta jarabawar tare da rukunin 2026.
NLC ta kuma buƙaci a sake duba tsarin gudanar da Hukumar Ilimin Sakandaren FCT da Hukumar Ilimin Bai Ɗaya ta FCT, tana mai cewa matakan da gwamnatin FCT ta ɗauka kawo yanzu ba su samar da mafita mai gamsarwa ba.
A nasa ɓangaren, gwamnatin FCT ta bayyana cewa manufofin da suka shafi ƙarin girma da sauya wurin aiki suna da alaƙa da ƙa’idojin aikin gwamnati, da guraben da aka amince da su da kuma tsarin gudanar da ma’aikata.
NLC ta umarci ma’aikatan gwamnati da na kamfanoni masu zaman kansu a FCT, da ƙungiyoyin da ke ƙarƙashinta, da su janye ayyukansu har sai an warware buƙatunta.
Ta kuma kafa kwamitocin sa ido domin tabbatar da bin umarnin yajin aikin a sassa daban-daban na babban birnin tarayya.
Yajin aikin na iya shafar makarantu, asibitoci, ofisoshin gwamnati da sauran ayyuka a Abuja, yayin da ake jiran ƙarin tattaunawa tsakanin NLC da gwamnatin FCT domin samo hanyar da za ta kawo ƙarshen rikicin.