Ɗan takarar shugaban ƙasa na jam’iyyar ADC, Peter Obi, ya taya malaman Najeriya da na duniya murnar Ranar Malamai ta Duniya da ake bikin kowace ranar 5 ga Oktoba.
Obi ya ce malamai na daga cikin ginshiƙan ci gaban kowace al’umma, saboda rawar da suke takawa wajen gina tunani, tarbiyya da makomar yara da matasa.
Ya yaba wa malaman Najeriya bisa jajircewa da sadaukarwar da suke yi duk da ƙalubalen tattalin arziki da yanayin aiki, tare da kira ga gwamnati da ta ƙara inganta jin daɗinsu, biyan albashi a kan lokaci da samar musu da ingantattun kayan aiki.
- Sojoji sun ceto mutanen da aka yi garkuwa da su a Zamfara
- ’Yan Sandan FCT sun yi gargadi kan motocin da ba su da lambar rajista
Ya kuma ce Najeriya ba za ta iya magance matsalolin yaran da ba sa zuwa makaranta, rashin aikin yi, talauci da ƙarancin ci gaba ba tare da zuba jari mai ɗorewa a fannin ilimi ba.
Obi ya ce ya kamata ilimi ya samu ƙarin fifiko a tsarin kasafin kuɗi da tsare-tsaren gwamnati, tare da bai wa malamai da kayayyakin more rayuwar makarantu kulawar da ta dace.
Ya gode wa malaman Najeriya bisa ci gaba da gina ƙasar “ɗa guda a lokaci guda”, yana mai cewa kyakkyawar Najeriya za ta samu ne ta hanyar saka jari a cikin jama’a.