Rundunar ’Yan Sandan Jihar Kano ta gayyaci Hon. Aminu Abdullahi Warkal domin yi masa tambayoyi kan wani bidiyo da ya yadu a kafafen sada zumunta, inda ake zarginsa da nuna bindiga a yayin wani taron siyasa.
Rundunar ta ce jami’anta sun gano bidiyon ne yayin gudanar da sintirin yanar gizo, inda ake ganin Warkal da wata bindiga da ake zargin Pump Action Rifle ce.
- ’Yan Sandan FCT sun yi gargadi kan motocin da ba su da lambar rajista
- NDC ta musanta zargin Seriake Dickson na aiki da APC
Kwamishinan ’Yan Sandan Kano, CP Ibrahim Adamu Bakori, ya umarci a gayyaci Warkal zuwa hedikwatar rundunar da ke Bompai, Kano, inda a yanzu yake a hannun sashen binciken sirri na rundunar domin gudanar da bincike.
’Yan sandan sun ce idan binciken ya tabbatar da zargin, nuna bindigar na iya zama take dokar mallakar makamai, tare da barazana ga zaman lafiya da tsaron jama’a.
Rundunar ta gargadi ’yan siyasa da magoya bayansu da su guji duk wani aiki da zai iya haddasa tashin hankali, tana mai cewa za ta dauki mataki kan duk wanda ya karya doka ba tare da la’akari da matsayinsa ba.