Wani kwamitin bincike ya gano cewa hukumar tsaro ta farin kaya (NSCDC) ta tsare wani mutum mai suna Emmanuel Emeka kan wata takaddama ta bashin kuɗi da ba ta da alaƙa da haƙar ma’adinai, kafin ya mutu a hannun hukumar a Minna, Jihar Neja.
Rahoton ya bayyana cewa an tsare Emeka ne a lokacin da hukumar ke gudanar da samamen da ya shafi zargin haƙar ma’adinai ba bisa ƙa’ida ba a ranar 15 da 16 ga Satumbar 2026.
- ’Yan sanda sun ƙwace motar da ke ɗauke da lambar Fadar Shugaban Ƙasa da ake zargin ta bogi a Abuja
- Tinubu ba shi da shirin ɗaga Birnin Tarayya daga Abuja zuwa Legas – A4A
Kwamitin ƙarƙashin jagorancin Jonathan Kure, tsohon Mataimakin Darakta-Janar na Hukumar DSS, ya ce tsare mutumin ya saɓa wa ƙa’idojin doka, kuma an ci gaba da tsare har zuwa lokacin da ya mutu tare da sauran fursunonin.
Binciken ya kuma gano cewa jami’an hukumar sun tsare mutane fiye da lokacin da doka ta amince da shi, tare da kasa tabbatar da ingantattun matakan kare haƙƙin waɗanda ke hannunsu.
Rahoton ya bayyana tsare Emeka a matsayin ɗaya daga cikin misalan gazawar jami’an wajen bin doka da kula da fursunoni, tare da ba da shawarar ɗaukar matakan ladabtarwa da bincike kan jami’an da ke da alhaki.