Hukumomin tsaro a ƙasar Liberia sun ƙona hodar iblis mai nauyin kusan tan 4.2, wanda aka ƙiyasta darajar sa ta kai kusan dala miliyan 336, kwanaki kaɗan bayan kama mafi girman miyagun ƙwayoyi a tarihin ƙasar.
Hukumomin ƙasar sun bayyana cewa bincike ya gano wasu jami’an ‘yan sanda da ake zargi da taimakawa wajen jigilar hodar iblisin bayan shigowar ta ƙasar, daga cikin waɗanda ake tuhuma akwai shugaban rundunar sintirin manyan hanyoyi da kuma shugaban sashen manyan laifuka na ‘yan sanda.
Sufeto Janar na ‘Yan Sandan Liberia, Gregory O.W. Coleman, ya ce an kama wani mataimakin kwamandan ‘yan sanda a babban filin jirgin saman ƙasar cikin waɗanda ake zargi yayin da ake ci gaba da bincike.
- Wike ya sha alwashin kammala duk ayyukan Titunan Abuja kafin ƙarshen 2026
- Tinubu ya rusa Kwamitin sa ido kan sayar da kadarorin gwamnati
Ma’aikatar Shari’a ta Liberia ta ce an gano hodar ne yayin wani samame a wani gida da ke yankin Duazon, mai tazarar kilomita 28 daga babban birnin ƙasar Monrovia, an kama wani ɗan ƙasar Serbia da kuma wani mutum ɗan ƙasar Colombia da Spain.
Ƙasashen yammacin Afirka na ƙara zama hanyar masu safarar hodar iblis daga Kudancin Amurka zuwa Turai, inda masu safarar ke amfani da rashin tsaro a wasu yankuna.
Wata Kungiya dake yaƙi da manyan laifuka wato Global Initiative Against Trans-national Organized Crime ta ce kaso da yawa na hodar iblisin da ake kaiwa Turai na wucewa ta yankin Africa.