Mataimakin Shugaban Ƙasa Kashim Shettima ya shiga cikin shugabannin duniya wajen buɗe babban taron Majalisar Ɗinkin Duniya karo na 81, UNGA, da ke gudana a birnin New York.
Shettima, wanda ke wakiltar Shugaba Bola Ahmed Tinubu tare da jagorantar tawagar Najeriya, zai gabatar da jawabin Najeriya a ranar Alhamis, 24 ga Satumba, inda zai bayyana matsayinta kan manyan batutuwan duniya da manufofin Najeriya.
- TCN ta ƙaddamar da sabon tsarin yaƙi da cin hanci
- Tinubu ya yaba da zuba jarin dala miliyan 800 a aikin iskar gas na Ima
Taron na bana, wanda ke gudana daga 22 zuwa 28 ga Satumba, na ƙarƙashin taken “Maido da amana, tafiyar da sauyi: Majalisar Ɗinkin Duniya da ke samar da sakamako ga kowa”, tare da halartar shugabannin ƙasashe daban-daban.
A yayin tarukan da ya halarta a New York, Shettima ya kuma yi kira ga ƙasashen Afirka da su daina dogaro da fitar da albarkatun ma’adinai danye, su mayar da hankali kan sarrafa su da samar da masana’antu domin ƙirƙirar ayyukan yi da bunƙasa tattalin arziki.
Shettima ya ce Najeriya za ta yi amfani da taron wajen bayyana muradunta da ƙarfafa haɗin gwiwa da sauran ƙasashe kan zaman lafiya da tsaro da ci gaba mai ɗorewa da sauyin yanayi da gyaran tsarin tattalin arzikin duniya.