Sanarwar da mukaddashiyar Daraktar Hulɗa da Jama’a ta Rundunar Sojojin Najeriya, Kanal Appolonia Anele, ta fitar a ranar 17 ga Oktoba, 2026, ta ce hafsan ya kai ziyarar duba aikin ba tare da sanarwa tun da wuri ba a ranar Juma’a, 16 ga Oktoba, domin tantance yadda aikin ke tafiya da kuma ingancin gine-ginen.
A yayin ziyarar, Shaibu ya duba gine-ginen gidajen zama na sojoji, hanyoyin cikin barikin, tsarin samar da ruwa da sauran muhimman kayayyakin more rayuwa da aka tsara domin samar da yanayin zama mai kyau ga sojoji da iyalansu.
- Kotu ta yanke wa ’yan daba takwas hukuncin ɗaurin shekara takwas a Bauchi
- Hukumar Shige da Fice ta horas da jami’ai 87 kan fasahar kula da iyakokin Najeriya
Ya kuma samu bayanai daga injiniyoyin aikin da masu ba da shawara kan matakin da aka kai, ƙalubalen da ake fuskanta da kuma lokacin da ake sa ran kammala aikin.
Babban hafsan sojojin ya bukaci ’yan kwangilar da su ci gaba da gudanar da aikin cikin sauri, tare da kiyaye ƙa’idojin inganci da kammala shi a kan lokaci ba tare da rage darajar aikin ba.
Ya bayyana cewa gina barikin, wanda aka sanya wa sunan Shugaban Ƙasa Bola Ahmed Tinubu, wani muhimmin mataki ne na rage ƙarancin gidajen zama ga sojoji, inganta rayuwarsu da ƙarfafa musu gwiwa wajen gudanar da ayyukansu.
Shaibu ya sake jaddada cewa rundunar za ta ci gaba da sa ido kan ayyukan gine-gine a barikoki da sauran sansanonin sojoji, ciki har da ziyara ba tare da sanarwa ba, domin tabbatar da inganci, gaskiya, riƙon amana da kuma amfani da kuɗin da aka ware yadda ya kamata.