Shugaban Ƙasa Bola Ahmed Tinubu ya taya Ministan Ma’adinai da Ƙarafa, Dele Alake, murnar cika shekaru 70, yana bayyana shi a matsayin amintaccen aboki, ɗan’uwa kuma mai jajircewa wajen hidimar ƙasa.
A cikin saƙon taya murnar, Tinubu ya ce Alake mutum ne mai tsayin daka, gaskiya da rikon amana, tare da nuna cewa a cikin shekaru da dama da suka gabata ya san shi a matsayin mutum mai himma da jajircewa wajen cimma sakamako.
Shugaban ya yaba da gudunmawar Alake a aikin jarida, inda ya ce ya yi amfani da alkalamin sa wajen fallasa matsalolin da suka addabi Najeriya, musamman a lokacin mulkin soja da kuma fafutukar dawo da dimokuraɗiyya.
- Tinubu ya koma Abuja bayan kwana shida a Lagos
- ’Yan sanda sun gayyaci Aminu Abdullahi Warkal kan zargin nuna bindiga a Kano
Tinubu ya kuma tuna lokacin da Alake ya kasance Kwamishinan Yaɗa Labarai da Dabarun Sadarwa na Jihar Legas na tsawon shekaru takwas, yana mai cewa ya taka rawa wajen inganta tsarin sadarwar gwamnati da jama’a.
A matsayinsa na Ministan Ma’adinai da Ƙarafa, Tinubu ya ce aikin Alake na ci gaba da samun karɓuwa a Najeriya da wajen ƙasar, musamman saboda rawar da yake takawa a harkokin ma’adinai da kuma jagorancinsa na Africa Minerals Strategy Group.
Shugaban ya yi masa addu’ar samun ƙarin shekaru cikin koshin lafiya, yana mai cewa ya ci gaba da hidima ga Allah, ƙasa da bil’adama.