A cikin wata sanarwa da jami’in hulɗa da jama’a na rundunar, DSP Yazid Abubakar, ya fitar ranar 19 ga Oktoba, 2026, rundunar ta ce lamarin ya faru ne da misalin ƙarfe 12:42 na rana ranar 18 ga Oktoba, lokacin da ’yan bindiga masu yawa suka kai hari garin tare da harbe-harbe a sama, lamarin da ya jefa mazauna yankin cikin fargaba.
Sanarwar ta ce maharan sun yi garkuwa da mutane biyu, sun kwashe babura shida, sannan suka sace wasu tumaki da awaki waɗanda ba a bayyana adadinsu ba.
- PRP ta zargi APC da raina ’yan Arewa, ta ce za ta kalubalanci Tinubu a zaɓe
- Jami’an tsaro sun kama mutane 430, ciki har da mata 50, a Yamai
- Hafsan Sojojin Najeriya ya isa Rwanda domin ƙarfafa haɗin gwiwar tsaro
Bayan samun rahoton harin, jami’in ’yan sanda na sashen Bukkuyum ya tattara jami’an rundunar ya tura su wurin, tare da jami’an tsaron al’umma (CPG) da ’yan sa-kai.
Haɗin gwiwar jami’an tsaron ya kai ga ceto mutanen biyu ba tare da sun samu rauni ba, da kwato dabbobin da aka sace da mayar da su ga masu su.
Sai dai rundunar ta ce jami’an tsaro na ci gaba da ƙoƙarin ganowa tare da cafke waɗanda suka kai harin, waɗanda suka tsere, da kuma kwato baburan da suka sace.
Kwamishinan ’Yan Sandan Jihar Zamfara, CP A. M. Bello, ya yaba wa jami’an tsaro da suka shiga aikin ceto cikin gaggawar da jajircewarsu.
Ya kuma sake tabbatar da aniyar rundunar na kare rayuka da dukiyoyin jama’a, tare da kira ga mazauna jihar da su riƙa bayar da sahihan bayanai cikin lokaci domin taimaka wa jami’an tsaro wajen yaƙi da aikata laifuka.