Rundunar ‘yan sandan jihar Sokoto ta ce jami’anta sun dakile wani harin ‘yan bindiga tare da kwato tumaki 43 da aka sace daga hannun maharan a ƙaramar hukumar Binji ta jihar.
Lamarin ya faru ne a daren ranar 30 ga Yuli, 2026, bayan samun kiran gaggawa cewa wasu ‘yan bindiga masu ɗauke da makamai sun kai hari ƙauyen Anada, inda suka yi harbe-harbe tare da kwashe dabbobin al’umma.
Bayan samun rahoton, jami’an rundunar ‘yan sanda ta Binji tare da tawagar yaki da garkuwa da mutane sun gaggauta zuwa wurin, inda suka tare hanyoyin da ake zargin maharan za su bi.
- Liberia ta ƙona hodar iblis mai nauyin tan 4.2
- ‘Yan Sandan sun kama masu ɓarnata kayan gwamnati a Abuja
Rundunar ta bayyana cewa jami’an sun yi arangama da ‘yan bindigar, lamarin da ya tilasta musu gudu zuwa cikin daji tare da barin dabbobin da suka sace.
An samu nasarar kwato dukkan tumaki 43 ba tare da an samu asarar rai ko jikkata ba.
Kwamishinan ‘yan sandan jihar Sokoto, CP Hayatu Hassan Shaffa, ya da jaddada cewa rundunar za ta ci gaba da ƙoƙarin kare rayuka da dukiyoyin al’umma.
Ya kuma buƙaci mazauna jihar da su ci gaba da bai wa jami’an tsaro sahihan bayanai domin taimaka mata wajen dakile ayyukan masu aikata laifuka.