Adeleke ya bayyana wannan ƙarfin gwiwar ne bayan ya kaɗa ƙuri’arsa a Gunduma ta 2 ta Sagba Abogunde, Rukunin Zaɓe na 9, a Ƙaramar Hukumar Ede ta Arewa.
Kamfanin Dillancin Labarai na Ƙasa (NAN) ya rawaito cewa gwamnan ya ƙaraso rukunin zaɓen da misalin ƙarfe 8:32 na safe, tare da rakiyar dimbin magoya baya.
Bayan Jami’in Gudanarwa na Gunduma ta 2, Rukunin Zaɓe na 9 ya tantance shi a ƙarfe 8:35 na safe, ya ci gaba da kaɗa ƙuri’arsa.
Da yake jawabi tsawon kaɗan bayan kaɗa ƙuri’ar tasa, Adeleke ya ce yana da ƙarfin gwiwar fitowa da nasara a zaɓen.
Ya yi kira ga masu zaɓe da su fito ɗandazo domin amfani da haƙƙinsu na ɗan adam, inda ya jaddada cewa ya kamata su kare ƙuri’unsu har zuwa ƙarshen tsarin zaɓen.
- Yaduwar ƙwayoyin cuta masu jure maganin rigakafi na ƙara zama barazana ga Duniya
- Tamowa a Sokoto: Yara na fuskantar barazanar rashin abinci mai gina jiki
A cewarsa, zaɓen yana ba al’ummar Osun damar yanke shawarar wanda zai mulke su a shekaru hudu masu zuwa.
Gwamnan ya ƙarfafa wa masu zaɓe gwiwar kasancewa masu bin doka da oda a tsawon lokacin kaɗa ƙuri’a da haɗa sakamako.
Haka kuma ya yi kira ga masu zaɓen da su tsaya a rukunan zaɓensu domin sa ido kan tsarin, daidai da ƙa’idojin Hukumar Zaɓe Mai Zaman Kanta (INEC).
Sai dai gwamnan ya bayyana cewa ya samu labarin wani jami’in ɗan sanda da ke shirin tarwatsa tsarin zaɓen a Ede.
Ya yi kira ga Babban Jami’in Ɗan Sandan Ƙasa (IGP) da ya gaggauta cire wannan jami’in ɗan sandan daga jihar.
“Mun kuma samu labarin cewa ana tsoratar da magoya bayanmu a Modakeke da wasu yankuna na jihar ta hannun wasu jami’an ɗan sanda domin hana su damar kaɗa ƙuri’a,” in ji shi.
Haka zalika Adeleke ya yi kira ga magoya bayansa da su sa ido kan ƙartuttukan zaɓe na ƙirƙira waɗanda za a iya amfani da su a wasu rukunan zaɓe domin yaudarar masu zaɓe.
Duk da haka, ya nuna kyakkyawan fata cewa zaɓen zai kasance cikin lumana, inganci, kuma zai yi daidai da muradin al’umma.