Babbar Kotun Tarayya da ke Lokoja a jihar Kogi ta soke wani hukunci da ta yanke a baya wanda ya umarci Hukumar Zaɓe Mai Zaman Kanta ta Ƙasa, INEC, ta yi wa Jam’iyyar NDC rajista a matsayin jam’iyyar siyasa.
Mai shari’a, Isah Dashen ne ya yanke hukuncin a ranar Juma’a, inda ya bayyana cewa wajibi ne a saurari dukkan ɓangarorin da abin ya shafa kafin a yanke hukunci kan lamarin.
Kotun ta amince da bukatar Jam’iyyar PMP bayan ta bayyana cewa tana da ruwa da tsaki a shari’ar.
- Ba za mu dauki tubabbun ’yan ta’adda aiki ba – DIG Mohammed
- ICPC ta gurfanar da El-Rufai da Jimi Lawal da wasu mutum biyar kan kwangilar CCTV ta naira biliyan 8.6
Alkalin ya ce hukuncin da aka yanke a watan Disamban 2025 yana da nakasu saboda ba a bai wa dukkan masu ruwa da tsaki damar kare matsayinsu ba.
Kotun ta kuma bayar da umarnin a mayar da komai yadda yake kafin hukuncin ranar 10 ga watan Disamban 2025, tare da umartar a sake fara sauraron shari’ar daga farko.
Lauyan Jam’iyyar PMP, Chikezie Ekeocha, ya ce sun garzaya kotu ne bayan gano cewa Jam’iyyar NDC ta yi amfani da tambarin da PMP ta gabatar wa INEC tun kafin a fara sauraron shari’ar.
Ya ƙara da cewa hukuncin na nufin dakatar da duk wani mataki da hukumar INEC ta ɗauka dangane da rajistar Jam’iyyar NDC, ciki har da takardar rajista da sanya jam’iyyar cikin bayanan hukumar, har sai an kammala sauraron shari’ar tare da haɗa dukkan ɓangarorin da abin ya shafa.