Fitaccen jarumin masana’antar Kannywood da Nollywood, Ali Nuhu, ya ƙarfafa mabiyansa da sauran matasa da kada su bari kalaman mutane, sukarsu ko tsokanarsu su raunana musu gwiwa, yana mai jaddada muhimmancin mayar da ƙalubale zuwa wata hanya ta samun nasara
Ali Nuhu ya bayyana hakan ne a cikin wani rubutu da ya wallafa a shafinsa na Facebook, inda ya yi kira ga mutane da su kasance masu ƙarfin zuciya da jajircewa wajen neman cimma burinsu duk da ƙalubalen da suke fuskanta daga al’umma
A cikin saƙon nasa, ya ce:“Kalaman mutane da sukarsu da tsokanarsu idan aka karɓe su da tunani mai kyau, za su iya zama tubalin gina nasararka.
- Kannywood: An daura auren Jaruma Ummi Ibro
- An gano Matar da ta sace kanta a Otal
- Dan asalin Najeriya ya jagoranci Amurka ta doke Paraguay
Duk wani dutse da aka jefa maka, kada ka yi amfani da shi wajen gina Katanga kawai; a maimakon haka, ka yi amfani da shi wajen gina asasin nasararka
‘Ka yi amfani da sukarsu wajen gina daular nasararka.’
Ka dogara ga Allah, ka ci gaba da aiki tuƙuru, kuma kada ka bari kalaman mutane su raunana ƙarfin zuciyarka.”
Ali Nuhu ya bayyana cewa sau da yawa mutane kan fuskanci suka da kalamai marasa daɗi yayin da suke ƙoƙarin cimma wani buri, amma abin da ya fi muhimmanci shi ne yadda mutum zai ɗauki irin waɗannan kalamai
A cewarsa, idan aka karɓi suka da kyakkyawan tunani, za ta iya zama abin ƙarfafawa maimakon ta zama abin da zai karya gwiwa
Saƙon nasa ya samu karɓuwa daga mabiyansa da dama, inda suka bayyana cewa kalaman sun zo a lokacin da mutane da yawa ke buƙatar ƙarin ƙwarin gwiwa domin ci gaba da neman nasara duk da ƙalubalen rayuwa
Jarumin ya kuma tunatar da mabiyansa muhimmancin dogaro ga Allah tare da ci gaba da aiki tuƙuru, yana mai cewa nasara tana zuwa ne ga waɗanda suka yi haƙuri, suka jajirce, kuma suka ƙi bari ra’ayoyin mutane su hana su kaiwa ga burinsu
Masu sharhi na ganin cewa saƙon ya ƙunshi darasi mai muhimmanci ga matasa da sauran al’umma, musamman a wannan zamani da ake yawan fuskantar suka da matsin lamba daga kafafen sada zumunta.