Kamfanin Tace Man Fetur na Dangote ya koma sayar da Man Fetur (PMS) a kudin Naira, inda ya kawo karshen tsarin sayarwa da Dala na dan takaitaccen lokaci, yayin da ya ƙara farashin da ake sayar wa ‘yan kasuwa (ex-depot) da ₦140 a kowace lita.
Wannan sabon matakin yana zuwa ne mako guda bayan da gidan man da ke iya tace gangar mai 650,000 a rana ya dakatar da loda fetur a motoci sannan ya koma amfani da farashin Dala. Wannan shawara ta tattaɓa kasuwar fetur, ta rage wadatar mai, sannan ta haddasa mummunan tashin farashi a wuraren adana mai (depots).
An sanar da komawa cinikayya a Naira ga ‘yan kasuwa ta hanyar wata sanarwa da sashen kasuwanci na kamfanin tace man ya fitar a ranar Laraba, kuma dandalin masana’antar mai na Petroleumprice.ng ya tabbatar da hakan.
Sanarwar ta nuna cewa farashin kowace lita na fetur a ma’ajiyar mai ta gantry ya tashi daga ₦1,075 zuwa ₦1,215, wanda ya nuna ƙarin ₦140, ko kuma kashi 13.02%. Farashin loda mai ta ruwa (coastal loading) shi ma ya tashi daga ₦1,441,575 zuwa ₦1,602,495 a kowace metric tonne.
Sanarwar, wacce ke da taken “PMS Price Change Communication” (Sanarwar Sauye-sauyen Farashin Fetur), ta bayyana cewa sabbin farashin sun fara aiki nan take.
- APC ta yi watsi da zargin Atiku kan kasafin kuɗin shekarar 2026
- Ƙasashen AES na sha’awar karɓar baƙuncin gasar AFCON ta 2032
- FRSC ta gano motocin da ake zargin an sace su biyu a Edo ta hanyar NVIS
Rhoton ya ce: “Cikin girmamawa ana sanar da ku cewa duk yawan man da ba a riga an loda ba za a sake yi masa lakabin sabon farashi, wanda ya fara aiki daga ranar 22 ga Yuli, 2026. Muna buƙatar ku ci gaba da tura buƙatun siyen mai (orders). Idan kuna buƙatar ƙarin bayani, kada ku yi ƙasa a gwiwa wajen tuntubarmu.”
Sanarwar na nuni da komawar kamfanin zuwa sayar da mai a gida da kuɗin Naira bayan ɗan takaitaccen lokacin da ya koma tsarin Dala wanda ya haifar da damuwa a tsakanin ‘yan kasuwa da masu amfani da mai.
Jeremiah Olatide, Shugaban Kamfanin Petroleumprice.ng, shi ma ya tabbatar da cewa an sanar da abokan ciniki kan komawa gantry a ƙarƙashin sabon tsarin farashin Naira. “E, kamfanin ya koma sayar da samfuransa cikin kuɗin Naira,” in ji shi.
A ranar 15 ga Yuli, kamfanin ya dakatar da loda mai ta motoci da ta jiragen ruwa yayin da ya gabatar da tsarin farashin Dala don samfuran mai, wanda hakan ya tilasta wa ‘yan kasuwa nemo mai daga ma’adana na kudi inda farashin ya tashi sosai saboda ƙarancin mai.
A lokacin dakatarwar, matsakaicin farashin ex-depot a ma’ajiyar mai ta masu zaman kansu ya tashi daga kimanin ₦1,075 a kowace lita zuwa kusan ₦1,275, wanda ya nuna ƙarin ₦200, ko kashi 18.6%.
Wannan lamari ya sa ‘yan kasuwa masu zaman kansu suka dakatar da loda mai daga kamfanin na Dangote, suna masu cewa ba za su iya samo foreign exchange (kudade na kasashen waje) da ake buƙata don gudanar da kasuwancin ba.